ثقافة وفن

لحظة قبل ما نذاكر

كتبت دكتوره مروه بكر

لحظة_قبل_ما_نذاكر

لما نقول تعليم الاطفال بالمنزل يبقى بيجى فى بالنا علطول ان المسئول عن العملية التعليمية هنا فى الغالب بتكون الام
خلينى بقى يا ست الكل اقولك نتكلم فى شوية نقاط كدة هتسهلك العملية التعليمية مع أطفالك
اولا : النمط التعلُّمى
دة عنوانا النهاردة
كل أم نفسها ان ابنها لما يقعد يذاكر معاها وتخلص تسأله بعد ساعة ولا يوم عن اللى ذاكروه يرد عليها وهو فاهم ومش ناسى

طيب علشان المعلومات تدخل دماغ الطفل وتتخزن ويسترجعها فى الوقت اللى هو عايزه
لازم نبقى عارفين اولا ايه هى الطريقة او الباب المظبوط الللى ادخلُّه منه المعلومة
فى امهات بتقعد ابنها يردد وراها القرأن الكريم وتعيد وتزيد تعيد وتزيد وبعد كدة تسأله ناسى
طب ليه ما احنا عدنا مائة مرة اومال فين المشكلة؟ فى الواد ولا فى مخه ولا فيا انا؟

المشكلة انك يا حرام عملتى مجهووووووود كبييييييير بس دخلتى من الباب الغلط

كل طفل وله باب محدد بتدخل المعلومة منه

ربنا قالنا ايه فى القرأن الكريم
((….. السمع والبصر والفؤاد كل اولئك كان عنه مسئولا……))

1⃣ السمع
فى اطفال بنسميهم ( سمعييين) او النمط التعلمى بتاعهم نمط سمعى
يعنى المعلومات بتدخلهم عن طريق السمع
يعنى ترديد القرأن للاطفال دول ناجح جدااا معاهم
مش بس انك تعيدى وتزيدى لازم تنوعى فى طرق دخول المعلومة السمعية ليهم علشان التكرار بيثبت المعلومات وبينقلها من العقل الواعى للاواعى
فعلشان ننفذ التكرار بدون زهق لازم ننوع
يعنى
مرة انتى تقرأئى
مرة يسمع من كاسيت
مرة يسمع من موبايل
مرة يسمع نفسه بيقرأ بصوت عالى
ومرة يسمع صوته المسجل
او يسمع صوت معلمته ا. شيخه المفضل وهكذا
كمان يفضل تسمعيه حاجة وهو نايم
الكاسيت شغال فى اوضته وهو نايم مثلا
ولو بتحكيله قصة قوليله تفاصيل مسموعة زى
🙎وقت صلاة الظهر والاقامة شغالة دخلت المحل و كان دوشة اوى وصوت الموسيقى عالى. والولد ماسك مايك وبينده على الزباين🙎

طب نعرف الطفل السمعى ازاى؟
دة هتلاقيه بيعرف مين بيتكلم على الخط الارضى اول ما يسمع الو او السلام عليكم يقولك يا ماما دى طنط مروة
او يسمع خبطة الباب يقولك باب جيه
او يقولك يا ماما اسمعينى، سامعة فلان قال ايه، اللهجة بتاعة مكنتش عجبانى…

2⃣البصر
الاطفال البصرييين
او الطفل ذو النمط التعلمى البصرى

ودة بقى باب دخول المعلومات ليه، البصر
يعنى تستخدمى كتب مصورة
كروت مكتوب عليها الكلمات
فلاش كاردز مصورة
فيديوهات
خرائط ذهنية

لو بتحكيله قصة مسموعة يبقى تشرحى الاحداث اللى ممكن يتخيلها بعنيه يعنى مثلا
👱المحل كان يفتطه حمرا وكبيرة والولد كان تخين ولابس تيشرت اصفر وهكذا ووشه كان غضبان وهو بينادى على الزباين 👱

لو بتعلميه قرأن كريم يبقى لازم يشوف الايات او الكلمات القرأنية مكتوبة فى مصحف فى كروت او فلاش كاردز ويفضل تكون ملونة علشان تحفز بصرهم

طيب نفس السؤال
نعرف الطفل البصرى ازاى؟

دايما بيصور كل حاجة بعنيه
هياخد باله من لبسك وشكل الكتاب ولون الموبايل وهكذا ولما يجى يحكيلك عن موقف يقولك طنط اللى كانت لابسة كذا
او يقولك كل شوية بصيلى يا ماما وانا بكلمك
تصورى حصل كذا
تخيلى حصل كذا
واضح ان كذا كذا

3⃣الفؤاد
الطلاب الحسيين الحركيين
ذوى النمط الحركى
دول طلاب لازم يجربو ويكتشفو ويلمسو ويشمو ويتذوقو ويجرو وينطو وهما بيتعلمو

يعنى لو بتعلميهم ارقام او حروف تبقى من خشب او فوم او جوخ ولو كروت مكتوبة او غلاش كاردز ونخبيها ويدورو عليها او يقومو يلزقوها على السبورة او الحائط او ترسميها على السبراميك وينطو على الحرف اللى بتمليه او بتقوليه

لو عايزة تعلميه تاء تفاحة يبقى الافضل تجبيله التفاحة نفسها بشحمها ولحمها ويشمها ويتذوقها ويلمسها
لو عايزة تعلميه تاء تاج او تمساح فسهل تجبيله تاج بتاع اخته او تشتريله تاج
بالنسبة للتمساح. بقى هتجبيله مُجسم واى حاجة زيها

لو بتحكى قصة فالافضل تمثلى بوشك وجسمك المؤثرات االصوتية وتخلى فيه دراما وحركات الاطفال ينفذوها بنفسهم
👱‍♂️بعد ١٠ خطوات دخلت المحل… خليه يعد ١٠ عدات او ينط ١٠ نطات وهكذا 🙎

لو قرأن كريم بقى يبقى تكتبى الايات او الكلمات على فلاش كاردز واللى يقرأه يلصقه ويرتب الايات او الكلمات ما الى ذلك

معتقدش بقى ان هتسأل اعرف الطفل الحركى ازاى معروووف طبعا
بس دايما هتلاقيه فى كلامه بيقولك انا عندى فضول
عايز اجرب
وهكذا

سؤالى ليكم بقى هنا :
قولى اسم ابنك ونمطه التعلمى؟

السؤال التانى :
الموضوع اللى جاى تحبو اكلمكم على ايه ؟
تعديل :

لو كنت معلم او عندك اكتر من طفل فى نفس المرحلة ولكل منهم نمط مختلف
فبندمج بين الطرق يعنى وانا بحكى القصة اغير من صوتى ونغماته ( علشان الطفل السمعى )
واعرض صور للأشخاص او صور للأحداث واغير ملامح وشى (علشان الطفل البصرى)
واحرك ايدى او اتحرك بجسمى واخد معايا فى الحركات الأطفال الحركيين
او اقول للأطفال ارفعو ايديكم لفوق او اعمل ايدك مسدس زى الظابط ( علشان الأطفال الحركيين )

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى