مطبخ مملكتي

100 نصيحة مطبخية من مطبخ أم رودينا

مقدم من أم رودينا

 

1.لما تعملى أرز بشعرية وانتى بتحمرى الشعرية خلى لونها دهبى بيبقى الرز فاتح وزى اللولى  الأرز المصرى 2 كوب رز عليهم 2 كوب ماية ونص كوب شعرية والملح حسب زوقك بس اوعى تحدقى .

2.نسيتى معيار الماية لسقى الرز يبقى بعقلة صوباعك و الطريقة دى ناجحة

3.لما تيجى تسلقى مكرونة بنحط ملح فى الماية قبل ما تغلى علشان نعمل معادلة لطعم

4.طاشة الملوخية بتحمرى الثوم فى معلقة سمنة الاول ولما يبدء يدخل على اللون لدهبى نزلى عليهم الكسبرة تقلبتين وطشيها

5.لما تيجى تعملى شوربة الملوخية حطى فيها شوية ثوم مفروم وكسبرة ومكعب مرقة دة لو الشربة مش دسمة لو دسمة نستغنى عنة وابقى حطى رشة سكر

6.دقيق البسبوسة اسمو( سميد)او (سمولينا)

7.دقيق البسيسة اسمو دقيق ذرة

8.الشربات الحلويات اسمو سيرب او قطر او شربات

9.انواع الزيوت (ذرة//عباد//زيتون)بالنسبة لعمل الأكل

10.انواع السمنة(نباتى //بقرى)

11.الزبدة(بلدى//صفراء)

12.ورد الكشرى (البصل المحمر)علشان يبقى كرسبى بعد ما تقطعى رشى علية دقيق و اقلى او بعد ما يتحمر رشى صفية من الزيت ورشى علية نشا.

13.صلصة الكشرى ابشرى طماطم وسبكيها ونزلى الصلصة غلوتين واعملى طاشة ثوم وكسبرة وطفيها بمعلقة خل ودى طريقتى المفضلة.

14.شطة الكشرى الزيت حمرى شطة فى زيت ساخن وطفى بالصلصة بتاعت الكشرى.

15.لو معندكيش زبادى وهتعملى معجنات هاتى كوباية لبن وعليها معلقة خل.

16.بديل البيكنج بودر كربوناته ومعلقة خل

17. محشى ورق العنب اعصرى ليمونة قبل السوا على وش الحلة.

18.لما اكلة ملحها يزيد منك حطى قطع تفاح او بطاطس تمتص الملح الزائد.

19.لما تكونى هتسلقى لحمة او فراخ خلى الماية تغلى اوى و تكونى نقعة اللحمة فى ماية وخل والفراخ نفس الكلام علشان نطرى الانسجة واى رائحة ظفارة تروح منها بس طبعا بنشطفها قبل ما نضعها فى الحلة

20.تتبيلة سلق اللحمة او الفراخ(حبهان/لورا/فلفل اسود/ملح/مكعب مرقة و ممكن من غير /رشة زنجبيل بودرة/رشة سكر صغيرة/بصلة حلوة كدة ندعك فيها التوابل ما عدا الملح لما تدخل على السوا)و دوقى احلى شوربة ولا الريحة بقة

21.لما تيجى تحمرى بصل لأى نوع أكل حمرى على نار هادية هتفرق فى الطعم ومش ها تتحرق منك

22.اول ما تدخلى مطبخك خلى عندك اولويات ازاى يعنى لو هتطبخى طلعى اللحمة انقعيها ولعى على ماية علشان تسلقيها والخضار ابدئى جهزى والرز بتعملى اخر حاجة علشان يبقى ساخن

23.لو هتعملى كفتة مشوية خلى الجزار يفرملك حتة ضانى وحتة كندوز وكلى احلى كفتة

24.مكرونة الكشرى بعد ما بنسلقها بنحط عليها معلقة زيت ونقلبها علشان ما تمسكش خناق فى بعض تبقى منفصلة عن بعدها

25.كل حاجة اعمليها بحب و بدون استعجال حبى مطبخك هطلعى احلى واطعم شغل

26.الوصفة اللى عينك ترتاح لها جربيها العين بدون قبل الفم

27.قبل ما تعملى معجنات اختبرى الخميرة الاول لو عملت فقعات هوا تبقى شغالة لو زى ما هى تبقى لا تصلح الاستخدام

28.لعمل الخميرة معلقة خميرة فورية معلقة سكر كوب ماء دافئ زى دمعة العين كدة

29.اختبار البيكنج بودر هاتى كوباية فيها شوية ماية و حطى رشة لو فار يبقى شغال لو زى ما هو يبقى لا يصلح

30.الرز البسمتى 2كوب ارز عليهم 4 كوب ماء

31. لما تشترى بتنجان رومى نقى الخفيفة

32.البطاطس بلاش تنقى اللى فيها بقع خضراء

33.الفراخ اشترى اللى لونها وردى

34.اللحمة اشترى قطعة يكون فيها حتة دهون علشان تعمل ريق لشوربة

35.السمك اشترى السمكة اللى عينها بتلمع والجسم يكون ناشف مش طرى والقشر ماسك مش بيطلع فى ايدك والخياشيم وردى وريحتها حلوة مش ريحتها عفن.

36.مش كل الاكل بنسبك بصل بس فى بصل و ثوم وفى ثوم بس و فى بنعملة طاشة كل دة هعرفك علية بكل بساطة

37.الفينو نشف عندك اطحنى وحطى علية توابل وبقى عندك فجيتار بيتى

38.خلى عندك نظرة دايما لحاجاتك يعنى تعرفى الاكل دة يكفى فردين امتى انزل اشترى اللى لزمنى اية اللى اقدر امشى نفسى بيه

39.البيض تحطى فى الثلاجة لانه مش بيستحمل بيضرب بسرعة

40.اللبن لو قطع منك اعملى قرص او زبادو او كيك او بشاميل بس ما يكونش مرر منك

41.بتخافى من البشاميل ليقلقع اضربى المكونات فى الخلاط وعلى نار هادية وقلبى لحد ما يتقل معاكى

42.سمك عجينة البينزا بيكون نص سم

43.سقى محشى البتنجان والكوسة والفلفل نص الحلة لانهم مش بياخدو سوا

44.رصى ورق العنب او الكرنب فى الحلة خلى فراغات بسيطة بينهم علشان يستوى براحتو والسقى يدوب الشوربة حوالية

45.سوا المكرونة مش تخليها تعجن واول ما تسقطيها تعدى تقلبى شواية فيها لحد ما تحسى انها مش ماسكة فى بعض

46.حاولى بقدر الامكان تعملى حاجاتك فى البيت زى تدميس الفول وعجينة الطعمية والبرجر و الكبيبة و المعجنات والكيك والحلويات والصابون بتفرق معاكى كتير وكل دول اسهل ما تتخيلى

47.الخضار المتواجد فى درج الثلاجة نضع الخضار الجديد أسفل والقديم أعلى الدرج.

48.البصل والثوم يوضع سويا فى رف التربو أما البطاطس توضع فى رف أخر.

49.أى مكسرات تغلف فى كيس و توضع فى الثلاجة للحفاظ عليها .

50.اللحم والفراخ والسمك توضع أسفل الفريزر علشان تضمنى أنها مش هتنزل أى سوائل على باقى المنتجات و تفسدها.

51.عند غسل ملابس ذات اللون الأسود والكحلى يفضل غسلهم بشامبو الملابس الغامقة للحفاظ على لونالملابس.

52.لتخزين الصلصة يفضل تخزينها بدون أى أضافات لعدم تغيير طعمها عند الاستخدام.

53.للحفاظ على الآرز والدقيق من السوس نضع حبوب فلفل أسود معاهم .

54.للحفاظ على البقوليات فى دولاب الخزين نرش فلفل أسود بين البقوليات.

55.سر كفتة الحاتى انها نافشة بيكنج بودر.

56.سر البرجر أنو مش بيكش البيكنج بودر.

57.السمك المقلى أستنى لما الزيت يسخن كويس و أبدئى أقلى مع وضع ليمون وماية التتبيلة اللى نزلت من السمك حطى معلقتين منها فى الزيت وشوفى بقى ريحة القلى والطعم ولا أروع.

58.الكفتة المقلية بتفك منك ضيفى بقسماط مطحون أو معلقتين دقيق أو نشا أو قطعة فينو سبق ونقع فى ماء ويصفى منها.

59.عند قلى السمك يوضع الدقيق على كيس بلاستيك و عند الانتهاء من القلى يلف الكيس ويوضع فى بسكات المهملات.

60.عند الانتهاء من وجبة الغدا يوضع بواقى الاكل فى كيس صغير ويربط ويوضع فى البسكات.

61.المكرونة مش بتستوى سوا كامل لازم يكون فيها عضة خفيفة علشان لما نقلبها ما تتهرى مننا ويبقى الشكل غير مرضى.

62.الكيك بعد خلط المكونات أخر حاجة نضيف البيكنج بودر سوا الكيك 180 الصينية مدهونة زيت فقط.

63.الطماطم الصفر عند تسبيكها يوضع لها حبه بنجر لأكتساب اللون الأحمر الجميل.

64.لعمل فراخ أو لحم أو كفته مشاوى يفضل التتبيل قبلها بيوم أحلى و أطعم.

65.المكرونة البشاميل الناجحة اللى بشاملها ثقيل.

66.الملوخية بعد الطشة لا يوضع عليها منعا لسقوط الملوخية.

67.أضافة الخل لأى عجين بيخليها هاشة وطرية.

68.خل التفاح والكربونات حلو جدا لأزاله صدأ الفرن والأوانى.

69.أزاله بقع الزيت من الملابس نضع دقيق على وجه البقع و أسفل قطعة منديل ونتركها ليمتص الزيت وبعديت نغسلها عادى.

70.البوتجاز بعد كل طبخة تغسلى كويس.

71.الملابس الجديدة أول غسلة تنقع فى ماء وخل للحفاظ على الالوان و بعدين تغسل لواحدها لمعرفت أذا بتبهت أو لا.

72.لو السمنة ريحتها أتغير يتم قدحها مع حبهان ولورا.

73.عند تخليل أى نوع مخلل لكل كوب ماء نضع معلقة كبيرة ملح.

74.لعمل حلويات مثل المهلبية او الكاستر او ارز باللبن لكل كوب لبن معلقة كبيرة نشا.

75.رشة سكر لتسبية لتقليل الحموضة.

76.لعمل الفراخ أو البانية كرسبى يوضع فى البقسماط بيكنج بودر أو نشا.

77.البشاميل البارد أنك تضربى المكونات مع بعض ويستوى على نار هادية // أما الساخن أنك تحمرى الدقيق فى السمنة وتنزلى علية باللبن وتكملى سوا.

78.العسل النحل لو سكر يوضع البرطمان فى ماء دافئ بيرجع زى الأول تانى.

79.حرارة فرن المعجنات 200.

80.البطيخة الحمرا اللى طبلتها ترن مش اللى مكتومة.

81.عندك موز كتير شيلى فى الفريزر وطلعى دخلى فى وصفات.

82.السلطة يوضع الملح عند التقديم لعدم نزول الماء الموجود بالخضار.

83.جففى قشر البرتقال و أحفظى فى برطمان حلو أوى فى الكيك وباقى الوصفات.

84.الخميرة البيرة أفضل من الفورية.

85.علشان الشربات ما يسكر منك ضيفى معلقة جاوكوز أو رشة ملح ليمون.

86.سر عصير الرمان بتاع المحلات لون غذائى أو شربات ورد.

87.بديل الدقيق فى البشاميل النشا.

88.أضافة شانتى لأرز باللبن والعاشوراء بيخليها تحفه.

89.عندك صينية فرن بدون مقاس هاتى شريط مقياسى و أفرضى أسفل الصينية هتعرفى مقاسها كام.

90.شوية عسل أسود وماية ورجيها كويس ورشى على وجة المعجنات قبل دخولها الفرن ولا أحسن مخبز.

90.بديل الزبادى للمعجنات كوب لبن ومعلقة خل.

91.خل وقطعة لية لعمل أى سندوتش زى المحلات مثل(شاورما/كبدة/سجق ….ألخ.

92.قطعة قشطة مع الرز بالشعرية او الابيض بتدى طعم حلو جدا.

93.عند سلق الكرنب و القرنبيط نضيف عصير نصف ليمونة لماء السلق للحفاظ على الحلة من تغير لونها.

94.العجين الناجح يبقى دقيق جميع الاستعمالات عجن لا يقل عن 15 دقيقة مكونات بدرجة حرارة الغرفة.

95.الخل فى المخلالات بيهريها.

96.كريم الخفق لا يوضع على النار لعدم قدرتو على تحمل درجة الحرارة.

97. بديك البنجر فى تخليل اللفت ورق كركدية بيعطى نفس اللون.

98.معلقة كبيرة خميرة فورية على كيلو دقيق لعمل مخبوزات.

99.المحافظة على الليمون وقت أطول يلف كل حبه فى ورق جرأد ويوضع فى كيس ثلاجة أو يوضع فى الفريزر وعند الاستخدام يخرج ويترك لحين ان يفك من الثلاج.

100.لا يتم غسل صاج الفرن وهو ساخن للحفاظ علية من الصدأ

 

 

 

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق