ثقافة وفن

يوميات سحلول و أم سحلول 8  

كتبت ريهام شرارة متابعه محمد ياسر

 

 

قال الإمام الشافعي:

بقدر الكد تكتسب المعالي و من طلب العلا سهر الليالي

و من رام العلا من غير كدأضاع في طلب المحال

تروم العز ثم تنام ليل يغوص في البحر من طلب اللآلئ

 

الإمام الشافعي مكنش يتخيل مستوى الفهلوة اللي بقينا فيها و اللي تكسب به العب به.. و كمان أصل معاليكوا اللي بيسهر دلوقتي بيسهر علي فيسبوك أو واتس أب يا إما خاربها editing لصوره علي انستاجرام..

بصوا بقى من الآخر أختكم مزنوقة في كلمتين لو مقلتهمش هتطق و تموت آه ياااااني ياما.. أنا جاية أفضفض لكم قبل ما آخد رسمي شهادة معاملة الأطفال أم ختم حكومي دي… أصل الواد سحلول عنده حق المرة دي..

 

مش مصدقين؟!

تعالوا أحكيلكم.. بس ممنوع شباشب الأمهات الطايرة لو سمحتوا..

 

(سحلول و المنظومة التعليمية و نظرة شائكة)

 

تحذير شديد اللهجة: أي أم ضغطها عالي من مذاكرة ولادها تعالي يا حبيبتي بسرعة عشان هنعمل حفلة انتحار جماعي أو هتشرفوا معايا في نفس العنبر بتاع الشهادة أم حكومي إياها دي…

المشهد العام دلوقتي امتحانات و مذاكرة و نيلة زرقا.. و طبعا كالعادة سحلولي له نظرته الخاصة الدقيقةفي كل حاجة و من حقه يبعبر عنها…يا رب أنا مش عايزاه أول الجمهورية أنا عايزاه ينجح بس قبل ما اتشل دا الواد دماغه ألماظات و النييييييعمة..

 

أم سحلول(قال يعني بحمسه و فاكرة نفسي إيجابية) : حبيبي أشطر ولد في الدنيا هيذاكر كام درس عربي دلوقتي؟

سحلول: ايه المقابل اللي هعمل كده عشانه؟

أم سحلول(طيب احدفه بايه في وشه دا) :يا حبيبي الامتحان الاسبوع الجاي من غير مساومات أرجوك ذاااااااكر…

سحلول: أيوة يعني فين المشكلة برده؟أنا طالب تشجيع.. مثلا هتلعب علي الكمبيوتر أو الموبايل أو التاب(مع ضحكة صفرا كده في كلمة تاب)

أم سحلول: طيب منطقيا.. الامتحانات كمان أسبوع.. التاب هينفعك بايه بقي و انت مش عارف تحل؟

سحلول(قاصف الجبهات كالعادة) : هو المنطقي إني أقولك هغش من اللي جنبي بس انت و أنا عارفين إني مش هعرف أعمل كده… أولا عشان حرام.. ثانيا.. اللي جنبي في سنة رابعة يعني أصغر مني…. أما عن التاب اسألي معالي الوزير هعمل ايه به… هو اللي قال تاب مش أنا إطلاقا…

امممممم دا كده ضرب مباشر و صريح تحت الحزام… الواد أخدني في توكر… لااااااااا كده الواد هيضيع مني يا سواد السواد يا هيسقط يا هنتسجن..لازم ألحق الموقف فوريرة..اه اومال يفشل يا اوختشي مثلا…

أم سحلول(كاظمة غيظي) : يا فيلسوف الغبرة مش وقت فزلكة.. عارف لو سقطت بابا هيسلخك بعد ما ينفخك و ياخد فروك الجميل دا يعمل منه بالطو…

سحلول(ميت من الضحك حاسس ان أمه هبلة) : هو انت بتكلمي تعلب يا ماما و لا بابا دا جزار مثلا…. أنا هفهمك…. لو طلعت حتي الأول علي الجمهورية هيجي مسؤول فاشل عمره ما داق النجاح يحبطني و يقلل مني فخليني محبط من دلوقتي من غير تعب في التعليم….

الواد صراحة فيلسوف عبقري.. بس برده كده هيضيع.. و إذ فجأة اتفتحت جاعورة الأم المصرية الشيك اللي محدش بيصدق منظرها الكيوت في الشارع.. بس كالعادة بيكبسني بردوده المقادرة علي إقناع المجرة كلها

 

سحلول(بثبات الأسود في الافتراس) : هو احنا مش اتفقنا إن الزعيق حجة الضعيف.. أنا مش بقولك مش هتعب خالص.. بس خليني أتعب في حاجة تستاهل و لها نتيجة و مش بتهين آدميتي.. و بعدين هو انت مش واخدة بالك إن المذاكرة و المعلومات كتيييييير جدا جدا علي دماغي.. دا كده ” مخي هيطلعله كرش من كتر المعلومات”….

حاولت أهرب من الضحكة المسخرة اللي هتوديني في داهية.. و قولت في سري اخص عليا الراجل رياضي و خايف علي مخه يبقي بكرش و الله يا دو عندك حق… يقطع اللي عايزين يطلعولك انت و ولادنا الحلوين كلهم” كرش في مخكم”…. بصراحة المصطلح عجبني و هتخذه كإنتيم في حياتي و منهج.. أستاااااااذ يا قلب ماما في القصف المباشر بدون سواتر..بس برده هتذاكر عشان مينفعش حاجة تحبطك مهما حصل .

 

الخلاصة: اوعوا تخلوا نظام مهما كانت قوته و سلطته يعمل ” كرش لولادكم في مخهم” و “تخمة في حياتهم” و “ارتجاع في مشاعرهم و طفولتهم”… احنا مكسبناهمش في بنك الحظ…

برغم إن ابني ذكي جدا و عميق و دماغه مفيش زيها.. بس زيه زي كل ولادنا الطبيعيين محتاج حافز حقيقي يحسسه إنه لازم يطلع لقدام و للأسف المشهد العام مش موفر لنا دا كأهالي…

 

خلوا بالكم من أرواح ولادكم و بلاش تضغطوهم عشان يبقوا دكاترة و مهندسين و حاجات تانية من غير روح و لا حياة..

 

كلمة أخيرة لله… افتكروا من فترة كان في كارثة اسمها لعبة الحوت الأزرق أغلب اللي لعبوها كانوا متفوقين دراسيا جدا و هنا أخطر إشارة علي كمية الضغط النفسي اللي بيتحطوا فيها في التعليم…. الحوت لسه مبعدش يا جماعة و ممكن يبلعهم أي سنة لو مركزناش معاهم و حبيناهم بجد…

 

خلاص بقي مش محتاجة أقولكم استنونا عشان عارفة إنكم بقيتوا بتدوروا علي حكايات سحلول اللي بترسم بسمة علي وشوشنا و أنا أولكم…. احنا اللي مستنيينكم

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق