مملكتي بتقولك

يوميات سحلول و أم سحلول 6 ريهام شراره

Mohamed Yaseer
عضو جديد · الآن
يوميات سحلول و أم سحلول 6 ريهام شراره

When you are at Rome, do as the Romans do!!
عندما تكون في روما،تصرف كما يتصرف الرومان!!
المثل دا زمان كنت بستغرب منه جدا.. و بيثير غضبي كفكر و سيكولوچية لحد ما شوفتها قدامي في أغلي ما عندي… يا مراااااااري…
مش مصدقين؟!
تعالوا أحكيلكم ..بس خلوا بالكم من تشغيل دماغ ولادكم أحسن تروحوا في داهية..
(سحلولي و اليوغي)
ملحوظة: معاليكم اليوغي دا حاجة شبه الكوتشينة هتلاقوا أمهات الصبيان عارفينها..

مستنياه أنا و بابا ينزل من درس الماثز.. هو بيعدي الشارع عنده نظرة ثقة و فخر غريبة قلقتني.. و فتح باب العربية و اتفتح معاه نافوخي بالمنطق.. آه يا بيه احنا عندنا كل حاجة بالمنطق حتي المصايب..

سحلولي: شوفتي يا ماما طلعت بفلوس الميس و نزلت ب5 جنيه..
أم سحلول :ليه يا حبيبي؟!أصلا مفيش باقي!!
سحلولي: باقي ايه يا ماما بقولك 5 جنيه.. دي كسبتها بعرق جبيني.. دا تمن شغلي.
أم سحلول(سرق الميس!!): عرق جبين ايه يا نيلة انت؟! انطق جيبت الفلوس دي منين؟؟
سحلولي: مفيش يا ستي اتفقت أنا و ابن الميس إني أعلمه اليوغي و آخد في الحصة5 جنيه و النهاردة كانت أول حصة.. صدقتي إن الفلوس دي حلال و إني اشتغلت و كسبتها و هحوشها..
متخيلين صدمتي في اللحظة دي؟! أنا مبقيتش عارفة اضحك و لا ألطم.. و بابا فضل يضحك و يقولي ما هي خلفتك هيطلع ايه يعني غير كده?.. بس كان لازم معالجة سريعة لمشروع النصاب دا..
أم سحلول: يا نهارك مش فايت.. انت نصبت علي ابن الميس؟يا حبيبي أنا بقيت متأكدة إني هتسجن علي ايدك.. مش كده ارحمني..
سحلولي(و رد قاصف لكل الجبهات اللي اتخلقت و لسه هتتخلق و أولهم أنا و الميس) :حلو يعني الميس نصابة..و أنا كنت عندها يبقي أعمل زيها دا العدل..
أم سحلول: ولا.. احترم نفسك.. عيب كده.. و ايه تعمل زيها دي كمان.. هو حد قال إن الميس بتنصب!!!
فاكرين المثل اللي في الأول!
سحلولي(بشموخ رجال الأعمال و الاقتصاديين و ريادي الأعمال عبر العصور):ما هو الميس بتاخد فلوس للحصة مقابل العلم اللي بتديهولي علي الرغم من إن الكتاب بتاعي و دا بالنسبة لك مش نصب.. و أنا كمان باخد فلوس قصاد العلم اللي بديه لابنها رغم إني بعلمه باليوغي بتاعي.. اشمعني أنا أبقى نصاب و هي تبقى ربة العلوم الفاضلة و نقدم لها القرابين!!!

اللهم صل علي نور سيدنا النبي..دي خلفة عباقرة اقتصاد مش أي حد.. بس ايه دخل كفار كفار قريش اللي طلعوا دول في الموضوع؟!..و اييييييه الدماغ المتكلفة دي يا سيد المعلمين..الواد دا ابن مين؟أكيد بدلوه في المستشفى ملهاش حل تاني..
مش هكدب عليكم رغم إن الموقف محرج.. بس أنا فرحت إنه شغل دماغه و فكر إنه لازم يتعب عشان ياخد مقابل لتعبه دا..بس لااااازم ال5جنيه ترجع لابن الميس برده…
سحلولي(خضني فجأة) :لاااااا يا ماما اللي بتفكري فيه دا مش ممكن يحصل أبدا.. أنا مش هضحي بتعبي و أنفذ خواطرك إلا لو الميس وافقت تديني حصص ببلاش ..
نقطة و من أول السطر.. لا سطر ايه ثواني أضربه بالشبشب و أجيب كراسة جديدة لانج. مستنينكم و سيل من الحكايات السحلولية و ياما في الجراب يا سقلاطوني..و استنوا سحلولي قريب علي يوتيوب❤️

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى
إغلاق