ثقافة وفن

همسات تربوية أون لاين

بقلم/مي أنور

*همسات تربوية أون لاين*

وبقينا في زمن الأونلاين، ولحد أمتى هايفضل أولادنا كدا علطول أون لاين ومفيش تركيز ؟!
سمعنا الكلام دا كتير في الفترة الأخيرة، مش مشكلة الأهم واللي لازم نعمله إننا نتكيف مع الوضع الحالي سواء كبار أو أطفال . لازم نهيأهم عشان يستقبلوا الموضوع بصدر رحب .
طبعًا كل أولادنا بيسمعونا وأحنا بنقول تعليم الأون لاين دا ملوش لازمة وأن الأمهات هي اللي هاتشيل الليلة ؛ فبلاش نسمعهم الكلام دا.
لأن طبيعي هما لما يسمعونا بنقول كدا هايستهبلوا ويرموا الكرة في ملعبنا .
وماما أبقي افتحي الأون لاين وافهمي الدرس وإبقي فهميني!

لأ ياقلب ماما هو أنا كنت باجي معاك المدرسة وأقعد جنبك في الفصل عشان أفهم.
فخليهم يشيلوا مسؤوليتهم.ويعتمدوا على نفسهم.
كل اللي حصل من تغير إنك بدل ماكنت بتروح تفهم في المدرسة ، فهي جت من عند ربنا وسهلها علينا ومفيش زحمة ولا مواصلات ولا حر. هاتقعد مرتاح على مكتبك تفتح جهازك وتتواصل مع مدرسك وزملائك وتفهم .
مهم جدًا تهيئة الطلاب قبل موعد الأون لاين.

أولاً :
ومبدئيًا ترتيب غرفتك مهمتك ، وترتيب مكتبك وكتبك حسب جدول الحصص وتعطير الغرفة.

ثانيًا :
تاخد الشاور وتلبس ملابس المدرسة أو ملابس الخروج المهم مش البيچامة ولا الفانلة الحمالات إنت كأنك خارج ، وافتح جهازك واستهدي بالله.
ولو ابنك في مرحلة صغيرة نبهي عليه إن جهازك مايتحركش من مكانه عشان الكاميرا لو مفتوحة ياحبيبي محدش يشوف ماما وإنت كأنك قاعد في المدرسة مش ينفع تقوم وتتحرك خليك على مكتبك أمام جهازك واسمع الدرس كويس .
ونقطة مهمة كمان يكون واكل وشبعان قبل الأون لاين عشان مش كل شوية يقوم زي فرقع لوز ويقولك جعان .
ثالثًا :
إبعاد كل ماهو مشتت للانتباه أو أي صوت عالي.واحتسب نية العلم وإنك بإذن الله هاتستفيد.
إدعي وقول يا الله ياعليم يامعلم نبينا داوود علمني ، وممكن تقول دعاء بدء المذاكرة وبعد ما تخلص تقول دعاء انتهاء المذاكرة .

رابعًا :
حاول تخصص لكل مادة عطر مختلف يعني اللغة العربية لها عطرها والرياضيات لها عطرها والعلوم لها عطرها .
الطريقة دي هاتخليك تركز أكثر وفي يوم الامتحان حط نفس عطر المادة المخصص لها.
سجل المعلومات الصعبة بصوتك وارجع اسمعها.
حط سبورة على الحائط واعمل نفسك مدرس وقوم اشرح الدرس لنفسك.
من الآخر إعمل كل حاجة تسهل على نفسك المذاكرة وإحمد ربنا إنك قاعد آمن مطمئن داخل منزلك وفي وسط أهلك.
إحمد ربنا على كل النعم اللي حواليك.
إرضى بأي وضع فرضته علينا الظروف.
حاول تسخر كل حاجة حواليك لتهيئتك.
وارضوا بالواقع فقد قال الله تعالى: (رَضِيِ اللّهُ عَنْهُم وَرَضُوا عَنْهُ ذَلِكَ لمِنْ خَشِي ربّهُ) سورة البينة .

كتبت
مي أنور

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى