صحة طفلك

مشكله العناد.. بقلم أيه محمد الشيخ

كتبت ايه محمد الشيخ اخصائيه صعوبات تعلم
العناد من المشكلات السلوكية الاكثر شيوعا بين الاطفال والتى يعانى منها كثير من الامهات..
تعريفه:
هو السلبية التى يبديها الطفل تجاه الاوامر والارشادت الموجه اليه من جانب الكبار من حوله..
او العناد ببساطة شديدة معناه: ارادة قوية ولكن فى اتجاه مخالف.. انتى يمين طفلك شمال؛انتى شمال ابنك عاوز يبقا يمين لانك بتتعامل مع طفل رافض للتعليمات والاوامر.
اشكال العناد:
للعناد 3 اشكال وهى 👇
1-مقاومة سلبية: لايهتم بالمطلوب منه (مش حابب ينفذ الامر)
2- تحدى ظاهر: يفعل شئ مش محبذ عند طلب الامر مثل ركل الباب برجله او يتأفف او يتفوه بكلام مش مفهوم.
3- تمرد واضح: يعمل عكس المطلوب منه؛ ويصرخ بشدة اذا تم رفض طلبه.مثال ( انا طلبت منه يشرب الحليب هيشربه بس وهو بيشرب هيسكبه على ملابسه او على الارض.

طب علاجه ايه ياميس؟؟؟!
قبل مانتكلم عن العلاج تعالوا نعرف ليه اطفالنا بيعاندوااا..
عندنا اسباب كتير اولهاااا!
1-ان طفلك عاوز يثبت ذاته 👌
2-طفلك مش عارف يفرق بين الواقع والخيال.. عشان كده لازم نختار برامج هادفه لاطفالنا وتكون مدتها بسيطة مثل (نان وليلى).
3- الشعور بالعجز عند القيام بالمهام المطلوبة.. المطلوب فوق مستوى قدراته وبالتالى مش هينفذ المطلوب 👌
المشكله الاكبر لو طفلك بيعاند عشان طالب اهتمامك بالتالى لازم نخصص وقت لاطفالنا للسماع لهم وللعب معهم ايضااا.
طيب دى الاسباب بس ياميس؟؟
لأ طبعا فى اسباب تانية… زى ايه!
1- التدليل الزائد للاطفال والاستجابة لطلباتهم .
2-الاستجابه السريعه لصياحهم ده للاسف الشديد بيعزز عندهم حدة العناد..
3-التفرقة فى المعاملة بين الابناء بتفضيل احدهم على الاخر.. هنا يشعر الطفل بسلوك انتقامى ضد الابن او الوالدين..
4-التذبذب فى المعاملة بين الشدة واللين والتساهل فى امور كثيرة..
5-وطبعا التلفزيون وتقليد الحركات العنيفة والمقاومة السلبية ورفض الاوامر كل ده واكثر بيخلق عندنا طفل عنيد طفل رافض للتعليمات…
طب الحل ايه ياميس..الحل بسيط جداا عندنا 10وصايا لو حققناها هتفرق مع الطفل بشكل كلى وجزئى لا ومش بس كده هتساعد فى خلق طفل ايجابى مطيع للتعليمات والاوامر الا وهى::::
1-العصبية: بلاش عصبية ممنوع الصراخ فى وجه الطفل بمغنى ان صوتى ميتعداش حدود المكان اللى متواجدين فيه والافضل اننا اثناء رفضه نسأله عن سبب الرفض.
2-النقد والسخرية:: بلاش ننقده امام اللأخرين بالعكس نمدحه امام الاخرين..
3-التقليل من اللاوامر والاستجابه لطلباتهم ولكن فى حدود المعقول.
4- البعد عن توتر العلاقة بينك وبين طفلك والتشجيع المستمر..
5-البعد عن المقارنات سواء بالايجاب او بالسلب.
6-التأنيب واللوم..البعد عن اللوم والعتاب على كل شئ.
7-التهديدات: بلاش التهديد على كل فعل يفعله بالعكس مصاحبة طفلك والتحدث باسلوب راقى معاه.(ياقلب ماما وياروحى وميرسى كتير) كل ده بيخلق طفل ايجابى مطيع للاوامر والتعليمات.
8-التوبيخ: البعد عن التوبيخ لانك قدوة لطفلك ومثله الاعلى فطبيعى هيقلدنا.
9-المبالغة فى الوعظ: بلاش كل مرة نفس المواعظ لان طفلك حفظ اسلوبك وبالتالى لا يبدى اهتمام للوعظ 😔
10-العقاب المستمر:: ممنوع منعا باتا العقاب البدنى.
ملحوظة 💗 البعد كل البعد فى التعامل مع الطفل العنيد ان تستخدمى صيغة الامر لانك بتتعاملى مع طفل رافض للتعليمات رافض للاوامر فبلاش ( اذهب..اعمل..) الافضل لو سمحت ياقلب ماما اعمل كذااا..بليز ياروحى صدقينى بيفرق معاه جدااا حتى لو ارادته قوية للرفض هيستجيب لرقى اسلوبك 👍
طيب دى الحلول بس ياميس؟
لاااا


فى حلول تانية بس خاصة بالام ذاتهااا
1- انك تخصص وقت لطفلك: تخصيص وقت للاستماع واللعب مع طفلك بدون اوامر وبدون تحكمات وبدون عقاب وليكن ساعة كل يوم.
2-تخصيص وقت للاستماع لهم: بما يدور حولهم والرد على استفساراتهم بكل منطق وعند تعسر الاجابة نضحك مع اطفالنا ونقولهم بصراحة انا مش عارفه الاجابة ايه رأيك نبحث عنها على النت ياقلب ماما وهنا هنكون علمناه مهارة البحث والقدرة على حل المشكلات 👌 ومن خلال استماعنا لاطفالنا هنقدر نعرف بيحبوا ايه وبيخافو من ايه ونقدر من خلال حكاويهم نعزز السلوك الايجابى ونزود الثقة بالنفس 👍
3- نكون لهم قدوة ونموذج: لازم نكثر من كلمة حاضر تتقال كتير ونقلل من كلمة لا لاناا قدوة بيحتذوا بها وطبيعى اطفالنا بيقلدونا فلازم نعاملهم بنفس الاسلوب اللى حابين يعاملونا بيه..
4- تقليل الاوامر والاستجابة لطلباتهم ولكن ف حدود التوازن.
صدقينى كل ده بيفرق جدا مع الطفل العنيد وطبعا لازم الابتسامة الحلوة والكلام الحلو (ياقلب ماما وياروحى وبليز يا روح قلب ماما) كل ده طبعاا بيفرق جدااا مع الطفل العنيد 👌بالاضافة لاستخدام اسلوب التعزيز والمكافئات..واخيرا وليس بأخر العناد مبيتعالجش او مبيدواش بالعناد..

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى