ثقافة وفن

كلمة من الحلوة ترد الروح ..

كلمة من الحلوة ترد الروح ..

نقصنا الكلمة الحلوة ؟
اينعم ؛ كلنا – بلا استثناء- نقصنا ومحتاجين الكلمة الحلوة من فترة للتانيه نشحن بيها ونكمل الطريق ..

الكلمة الحلوة بتفرق .. الكلمة الحلوة بتبسط عمر، فكرة إنك تجبر خاطر انسان بمجرد كلمة حلوة دي مش حاجة هينه ابدا لأنك بتسعد حد مستني منك إنه يحس بفرحة, و دي تساوي عند ناس كتير عمر؛ الكلمة الحلوة بتفرق وبتبدل وشوش وتبدل حياة.

الكلمه الحلوة قربت تختفى من حياتنا؛ كلمة الحب، كلمة التشجيع، كلمة التسامح، كلمة الصدق، و بقت “الكلمة الخايبة” سهل جدا إننا نقولها, و بقي الأصعب إننا نوصل رسالتنا ونصيحتنا بكلمة حلوة.. سهل جدا إننا ننتقد والأصعب إننا نغير بنى آدم بالكلمة الحلوة. الكلمة الخايبة السلبية بتموت نفسية الإنسان، لكن الكلمة الحلوة حتى لو بسيطة بتنعش روحه وترويها.

احنا في وسط زحمة الحياة نسينا ان الكلمه الحلوة صدقه وان اللي حولينا محتاجينها عشان نشد من أزرهم ونخليهم يكملوا صعوبات وضغوط الحياة. كتير جدا بتكون الكلمة الحلوة بارقة أمل بمقام رساله ليهم من عند ربنا بيقولهم انتوا ماشين صح كملوا الطريق للاخر .. الكلمة الحلوة بتشفي القلوب من صدأ الايام.

احنا بطبيعة الحال لما بنتعود على حاجة وتبقى موجودة في حياتنا دايما بننسى انها نعمه وممكن تزول في لحظة، وبننسى ان اللي مفرحنا ومقدرنا ممكن نصحى الصبح ما نلقيهوش موجود معانا ف الدنيا .. وبقينا ننسى اللي بيعمل معانا مواقف جدعنه كتيير. زحمة الحياة نستنا نبقي لطاف مع بعض من غير ما نحس، وبدل ما نكون جابري خواطر بقينا بنجرح بعض!

متستهنش بالكلمه الحلوة؛ لأنك متعرفش تأثيرها الايجابي على اللي قدامك هتبقى عامله ازاي. طلع الحلو اللي جواك للي يستاهله قبل ما يفوت الاوان .. قول للي بيعمل حاجة حلوة انه بيعمل حاجة حلوة؛ لأنك ماتتخيلش رد فعله وسعادته بكلامك هيبقى عامل ازاي. ابسط الناس هتلاقيهم جابرين للخواطر وحنينين في كلامهم ورفقاء دائمين للحب والود لأن حقيقي الدنيا مش مستهله!

ماتستخسروش الكلمة الحلوة في اللي بتحبوهم .. قولوا للناس اللي بتحبوهم انكم بتحبوهم .. قولوا للناس الحلوة انهم ناس حلوة وانكوا ممتنين لوجودهم في حياتكم .. متستخسروش كلمة من الحلوة اللي ترد الروح …

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى