ثقافة وفن

علاج النسيان عند الأطفال

بقلم أيه محمد الشيخ

علاج_النسيان_عند_الأطفال
كثير من الامهات بتيجى تقولى ياميس آية ابنى بينسى ومبيتذكرش دروسه اللى لسه مذكرهالو وكمان لو طلبت منه اى حاجه بينسى يعملهااا ايه الحل ياميس ؟؟

طبعا إذا عرف السبب بطل العجب!
لو عرفنا الأسباب هنحل عن طريق إزالة السبب، ومع العمل بشوية نصايح لتنشيط الذاكرة للملايكة:
، و منها:

#التكرار.. زي ما بيقولوا «التكرار بيعلم مين ؟؟؟ الشطار»

تكرار أي حاجة عايزاه يحفظها بيفيد في عدم نسيانها.

#ممارسة_الرياضة 🏃⛹ بتساعد على تنشيط الدورة الدموية ودة بيساعد على تحسين وتنشيط الذاكرة.

.#النوم_الكافي لطفلك يقيه من ضعف الذاكرة، ويساعده على استيعاب الحقائق المستفادة خلال النهار،

وكمان #تجنب_النوم_الزائد لانه ممكن يسبب خمول الذاكرة.

يفضل انه ميروحش يذاكر بعد ماياكل وجبة تقيلة 🍲🍜🍟عشان يقدر يركز فى المذاكرة،📚 وبالتالي يتجنب النسيان
ومش معنى كدة تخليه يذاكر وهو جعان 👌

ممكن يبدأ مذاكرة بعد الأكل بنصف ساعة مثلًا

ابدئي بالمادة سهلة الفهم أو اللي هو بيحبها ..
عليكِ إنك تساعديه على فهم اللي بيذاكره ،
أو توفري له الوسائل وتجنبي #الحفظ،

#الفهم هو اللي بيرسخ المعلومة في ذهنه

=طيب مش فاهم أعمل ايه؟! ابني غبي 🤯 ومخه تيفال 🍳

.. هرجع واقولك مفيش طفل غبي .. في طفل اتأسس خطأ وطفل متأسسش أصلا .. وانت أكيد أهملتي شوية .
طبعا دة غير ان كل طفل له قدراته .. وكل طفل بيتميز في حاجة أكتر من التاني ..
بصي يا ستى …
بسطي المعلومة على قد ماتقدري. دخلي اللي عايزة تشرحيه في قصة أو أغنية.. لو شرحتِ بطريقة مفهمهاش أو نساها لحنيها وغنيها وطبلي لو لزم الأمر 😊
وعيديها بأسلوب مختلف أسهل وأبسط
حاولي تبتكري.. حتى في حفظ كلمات الإنجليزي.. خليه يتعلم يتهجى .. مش العواميد اللي هتخليه يحفظ…

.جنبي طفلك استخدام #المحمول 📱إلا عند الضرورة، لأنه له أثره على ضعف الذاكرة.

تناول طفلك #لنظام_غذائى_متوازن يساعده على تنشيط ذاكرته، ويقيه من ضعف الذاكرة، والوجبات المتوازنة تحتوي على البروتين والمعادن والألياف والكربوهيدرات.

في بعض الأطعمة اللي بتساعد على تحسين ذاكرة الأطفال، منها الأسماك الغنية بـ«الأوميجا3» مثل سمك السلامون والتونة والفاكهة والخضروات والبقوليات والمكسرات، ومنتجات الألبان الغنية بالعديد من الفيتامينات والمعادن والأملاح المهمة لتنشيط ذاكرة
.. طفلك بيحب الشيكولاتة؟ جميل جدًا
الشيكولاته بتحتوي على مادة بتقوي الذاكرة..
.#القراءة لطفلك منذ الصغر بصوت عالي يساعده على تنمية ذاكرته، حيث إن قراءة القصة لطفلك مع تكرار دة يخلي الطفل يتعلم القصة.. وبعد كدة يقدر هو يحكيها فتنمي ذاكرته

.ألعاب الذاكرة كمان بتساعد على تقوية ذاكرة طفلك.
تقدرى تدخلى برنامج ذاكرة فى اى العاب عندك اه والله زى مابقولك كده..أى حاجه عندك فى البيت اشتغليهالو ذاكرة..
ــــــ ازاى ياميس؟
ـ هاقولك هاتى 5 الوان مشابك واعرضيهم عليه وشيلى لونين وخليه يتذكر انهى الوان مش موجوده 👌
هاتى قلم..استيكه..برايه..مسطره.. قلم احمر وخبى لونين وخليه يتذكرهم ايضااا… اى حاجه اى حاجه اشتغليها معاه فى البيت… الام الشاطره هى اللى تحول الكلام النظرى لعملى
اى فاكهه،، اى خضار اى الوان ـ، اى ادوات مطبخ،، المهم ننشط عنده خلايا المخ ورفع القدرة على الانتباه والتركيز ✌

#اعملي_روتين_يومى لطفلك، فالروتين بيساعد طفلك على تطوير مهارات الذاكرة.

#تقليل_مشاهدة_التلفزيون 📺 والكمبيوتر💻

وخاصة مشاهدة الرسوم المتحركة،
الإفراط فى مشاهدة التلفزيون يعيق المخ،
ويمكن استبدال دة ببعض البرامج المفيدة والأفلام الوثائقية، أو فيديوهات مدتها قليله زى نان وليلى..
او حتى #أنشطة هو يعملها وانتِ تساعديه أو انتِ اعمليها وهو يساعدك .. بتساعد على تطور مخ طفلك.

ابعدي عن #توتر_العلاقات بينك وبين الطفل.. بلاش عصبية.. بلاش صوت عالي.. بلاش توبيخ
دايما حفزيه. شجعيه. انت بطل انت ممتاز

مقدرش يستوعب المعلومة منك في وقت مش لازم تضغطي عليه بنفس الوقت انه يفهمها .. أجليها.. واشرحي غيرها
ومتنسوش ان نسب الذكاء متفاوتة بين الأطفال وكل طفل وله قدراته اللي ربنا خلقه بيها .. ممكن أنميها أو احبطها

وأخيرًا وليس آخرًا… #الدعاااااااء لهم ولأبنائنا جميعا وفقنا الله واياكم..

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى