مطبخ مملكتي

طريقة اللقمة الصفراء (المحوجة) طرية ومقرمشة من مطبخ أم رودينا

مقدم من ام رودينا

 

المحوجة الطرية

المقادير

3 ونص كوب دقيق يعني نص كيلو دقيق
معلقة كبيرة بكينج بودر
نص كوب حلبة مُغات
نص كوب سمسم
نص كوب حبة بركة
ربع كوب جوز هند ناعم
نص كوب سكر بودرة
3 /4 كوب عسل أسود
نص كوب زيت + معلقتين كبااار زيت تكملة المقدار
نص كوب سمنة سايحة باردة
معلقتين كبااار لبن بودرة
معلقتين كبااار لبن سايل
ربع معلقة صغيرة ملح

لوجه المحوّجة
3 ملاعق كبيرة سمسم
معلقتين كبااار حبة بركة

طريقة التحضير

أول حاجة نحط الزيت والسمنة فى حلة ونسخنهم عالناار عشان تسيح السمنة بس
ونسيبهم يبردوا تماااااما على جنب يعني 10 دقايق كده نجيب طبق عميق ننخل فيها الدقيق والبكينج بودر وعليهم الحلبة المُغات والعسل الاسود والسكر
والسمسم وحبة البركة وجوز الهند واللبن البودرة ونقلبهم كويس بمعلقة دقيقة كده
عشان يبقى الخليط مفرول و نحط السمنة والزيت السايحين الباردين واللبن السايل ونقلب بايدينا بدون عجن من فوق لتحت بحيث كل الدقيق يندمج مع الزيت واللبن
نجيب صينية مستطيلة طول في عرض 15* 30 سنتي وندهنها كويس اوووي بالسمنة ونفرد المحوجة فيها براحة ايدينا بحيث تبقى متساوية ونرش المحوجة بالسمسم وحبة البركة ونضغط بايدينا بسيط اوووي بس عشان يلزقوا بوش المحوجة
ونقطعها بالسكينة زي مابنقطع البسبوسة قبل ماتستوي بالضبط وندخلها فرن حرارة هاااادية 160 الى 170 على الرف الاوسط لمدة 40 دقيقة ان شاء الله
وبعدها نفتح عليها ونطفي الفرن من تحت ونشغل الشواااية عشان تتحمر من فوق ويبقى لونها دهبي وااضح دهبي محمر يعني مش دهبي فاااتح خاالص عشان لو دهبي فاتح هيبقى لون المحوجة بااااهت ومش نقطعها ابداا وهيا سخنة ولما تبرد نقطعها بالسكينة مكان التقطيع اللي قطعناه من البداااية ونقدمها بالف هنا

المحوجة المقرمشة

المقادير
كوبين ونص دقيق
نص معلقة صغيرة ممسوحة بكينج بودر
نص كوب زيت + معلقتين كبااار زيت
ربع كوب سكر بودرة
نص كوب عسل اسود
ربع كوب حلبة مُغات
ربع كوب سمسم
ربع كوب حبة البركة
ربع كوب جوز هند
معلقتين كباار مية
ربع معلقة صغيرة ملح

طريقة التحضير
نحط في طبق عميق كل المقااادير على بعض
الدقيق المنخووول مع البكينج بودر وربع معلقة صغيرة ملح
والحلبة والسمسم والعسل الاسود ونقلب كل المكونات مع بعض بايدينا بدون عجن
بحيث تندمج كل المكونات مع بعضها كويس اوووي وتبقى مفرولة
ونجيب صينية مستطيلة مقاس 30 * 15 سنتي وندهنها بالزيت كويس ونحط فيها كل مقداار المحوجة ونبططه بايدينا كويس اووي بحيث يكون سماكتها متساوية من كل الجهاات ونقطعها بالسكينة اصابع كأنها قرااااقيش بالضبط وندخلها فرن حرارة هااادية 160 الى 170 لمدة نص ساااعة ولما تستوي من تحت وتظهرلنا ان حوافها لونها دهبي نطفي النار من تحت ونشغل الشواية عالمحوجة من فوق عشان يبقى لونها دهبي محمر عشان تبقى مقرمشة.

 

 

الوسوم
اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق