فن ومشاهير

حوار|محمد نـجاتى.. لـم اتـوقـع وضـع اسـمـى بعـد مـحمد عـز والمنافسة اقوى خارج السباق الرمضانى

محمد نجاتى : 

كنت متوقع النجاح لكن بصراحة مش بالشكل ده ولا كنت متوقع ردود الافعال بالشكل

مش بندم على اى عمل عملته  أنا عندى كل الاعمال زى بعضها 

مكنتش متوقع نهائى وأول لما شوفتها إتضيقت وزعلت 

النجاح الاكبر بيكون خارج السباق الرمضانى

يعيش حاليا الفنان ” محمد نجاتى ” حالة من النشاط الفنى فقدم 4 اعمال فنية  متنوعة خلال هذا العام و بعد نجاح “سكن البنات “و “ضربة معلم “

كشف ” محمد نجاتى  ” فى حواره عن الصعوبات التى واجهه طوال مشواره الفنى  .

كمال تطرق ” نجاتى ” فى حواره لـــ مجلة ” مملكتى ” عن كيفية تخطيها العقبات وحجم المنافسة … وتفاصيل اخرى 

حوار : احمد حمدى 

مبروك  على نجاح مسلسل ضربة معلم عاوزين نعرف إيه اللى حمسك للمشاركة فى ضربة معلم ؟

أى عمل بيكون من الناس بيوصل للناس بسرعة ،أى عمل شعبى بيكون فيه رواج عليه كبير لأنه بيطرح مشاكل وقضايا مننا بنسبة كبيرة جدا موجودة فى مصر ،مسلسل ضربة معلم بيحمل رسائل مهمة جدا إحنا بقالنا فترة بعيد عن تقديم القيمة الفنية والقيمة الاجتماعية والقيمة الانسانية ضربة معلم فيه قيم إنسانية كبيره كانت غيبه عن الدراما بدأنا نشوفها فى ضربة معلم هتلاقى علاقة الابن بامه علاقة الصاحب بصاحبه وازاى الواحد ممكن يضحى من أجل صاحبه هتلاقى حالة فنية متكاملة فى ضربة معلم إحنا محتاجين نعمل أعمال بتعبر عننا بتعبر عن المجتمع بتاعنا الحقيقى

هل كنت تتوقع ردود الافعال على المسلسل ؟

كنت متوقع النجاح لكن بصراحة مش بالشكل ده ولا كنت متوقع ردود الافعال بالشكل ده دلوقتى كل مصر بتتفرج على ضربة معلم كل الناس بتابع حلقات المسلسل وديما بيسألونى عن أحداث الحلقات فى تواصل بينا وبين الجمهور وأنا الصراحة مكنتش متوقع كل ده و الحمد لله إن المسلسل نجاح وعلم مع الناس من بداية أول حلقة

 

كلمنا عن كواليس المسلسل وعلاقتك بفريق العمل؟

علاقتى بكل فريق العمل علاقة كويسة و علاقة أصدقاء و الكواليس كلها هزار وضحك ، أنا بتربطنى علاقةوصداقة بينى و بين محمد رجب منذ الصغر محمد رجب على المستوى الفنى شخصية ممتعه  ضربة معلم يعتبر اول عمل مباشر بينى وبين رجب  أنا بستغرب إزاى حافظ أسماء المجاميع بشكل ده ومعه فى كل عمل هو ممثل شاطر بيعرف يختار فئات محدش بيتنولها كتير طلع بدور الفوعلى فى ضربة معلم وقدم سواق التاكسى فى الاخ الكبير بيعرف يختار صح إحنا محتاجين نعمل أعمال بتعبر عننا

هل لو كان تم عرض ضربة معلم فى السباق الرمضانى كان حقق نجاح أ كبر ؟

لأ النجاح الاكبر بيكون خارج السباق الرمضانى ،لازم ناخد بالنا من الحتة دى إننا عندنا ١١ شهر نقدم فيها مسلسلات ونسيب رمضان للعبادة و للمسلسلات الدينية و المسلسلات التاريخية عشان من خلال الدراما بتربى وجدان شعب ،ونفسى فى يوم من الايام المسلسلات كلها تكون خارج شهر رمضان المبارك ،ومنها فرصة نديى للمنتجين إنهم يقدموا أعمال بره السباق الرمضانى

 

هل ترتيب الاسماء فى التتر  بيفرق معاك ؟وايه كان رد فعلك بعد ظهور اسم محمد عز قبل اسمك ؟

مكنتش متوقع نهائى وأول لما شوفتها إتضيقت وزعلت ،محمد عز أخويا وصاحبى وكل حاجه بس فى إعتبارات مش حابب أتكلم فيها أخجل إنى أتكلم فيها كانت  لازم تتعرف لوحدها ،وأنا الحمد لله  مستفيد أكتر بدورى وإستمتعت بأداه جدا عمل ناجح كبير وأنا سايب الحكاية دى للمخرج هو شاف إن ده إللى لازم يحصل ومع استاذ إسماعيل فارق بالذات أنا لو إتكتبت أخر إسم معنديش أى مشكلة  أهم حاجه عندى تقديم عمل يؤثر  فى الجمهور

  حدثنا عن دورك فى مسلسل سكن البنات ؟

سكن البنات كنت بشارك كضيف شرف وفوجئت باتصال من المخرج والمؤلف والمنتج بتكبير مساحة دورى لأن الدور عجبهم وتم التفاعل معه بشكل كبير مع الجمهور و الحالةاللى بنقدمها فى المسلسل عجبت الناس ومكنش عندى مانع خالص

كلمنا عن مسلسل يا انا يا جدو ؟وهل وقت عرضه كان غلط ؟

هو كان فيه حاجات كتير غلط مش وقت عرضه بس وده بسبب إن يوجد بعض منتجين بينتج دون درايه كاملة فى الانتاج و التسويق هو مسلسل لايت كوميدى دمه خفيف بس لم يتم تسويقه بالشكل الصحيح

  ايه أكتر عمل ندمت عليه ؟

مش بندم على اى عمل عملته  أنا عندى كل الاعمال زى بعضها بذاكر الدور كويس و بشتغل عليه وفى الاول والاخر الواحد بيتعلم من أخطائه

عاوزين نعرف إيه قصة ترشيح إسمك لتجسيد شخصية الفنان الراحل احمد ذكى ؟

أنا سمعت الموضوع ده زى أى حد ولم يعرض عليا حتى الآن  أى ورق لتجسيد شخصية الفنان الراحل احمد ذكى بشكل رسمى ،الفنان الراحل احمد ذكى هو الأب الروحى ليا كفاية إنى عرفت من الصحافة انى كنت مترشح لدور حليم بدل الفنان الراحل  هيثم احمد ذكى لكن كل شىء نصيب

هل السوشيال ميديا بقت منصة لطرح مشاكل الفنانيين ؟

السوشيال ميديا سلاح ذو حدين وإحنا كفنانين لازم نحافظ على بعض حتى لو فيه أى خلافات ما بينا مينفعش تكون على الملأ عشان ده بيقلل من قدرنا عند الجمهور،الجمهور بيحب يشوفنا فى أحسن صورة بلاش نبوظ صورتنا قدام الناس ، السوشيال ميديا اساسها هو التواصل بينا وبين الجمهور لانه الوسيلة الاسرع لأننا بنتواصل بشكل مباشر

ما الجديد بعد مسلسل ضربة معلم و سكن البنات ؟

بصور حاليا فيلم ليلة فى الجحيم و هو أول فيلم يقدم بتكنيكية عاليه وتصوير ويعد أول فيلم لاكلى لحوم البشر يوجد  إتجاه فى الفترة القادمة لإنتاج افلام رعب

هل يوجد اعمال فى دراما رمضان ٢٠٢١ ؟

لسه لحد الآن مفيش أى أعمال إتعرض عليا بالنسبة للسباق الرمضانى

 

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق