ثقافة وفنفن ومشاهير

حوار|طارق الشيخ .. لم اتقاضى اى مقابل مادى لغناء القاضية ممكن و عمرى ما هنغنى الاغنية دى تانى

طارق الشيخ :
لم اتقاضى اى مقابل مادى لغناء القاضية ممكن و عمرى ما هنغنى الاغنية دى تانى

لايوجد وجه مقارنة بين الغناء الشعبى و المهرجانات

التريند كله قصص واهميه

لم اقصد إهانة لاى حد أو سخرية لاى شخص أو كيان

أنا أخدة شتيمة لحد عشرين سنة لقدام بسبب القاضية ممكن

فيه فرق بين فنانة استعراضية جاية ترقص باللبس المحترم واحدة تانية جاية ترقص شبه عريانة فى الافراح

عمر الرقص الشرقى ما كان بالعرى

 

هو فنان تعلق بالغناء الشعبى منذ طفولته وكان لنشاته فى جى شعبى تاثيرا كبيرا على توجهه الفنى إذ اختار الاغنية الشعبية التى أرسى دعائمها الشيخ سيد درويش برع فى تقديم الاغانى الشعبية المرتبطة بهوم المواطن

تحدث المطرب  ” طارق الشيخ ”  فى حواره  لـــ  ” مجلة مملكتى ”

 

حوار : احمد حمدى

تصوير: محمد الشيمى

عاوزين نعرف تفاصيل اغنية السادة الكرام و كلمنا عن ردود الافعال اللى جت عليها  ؟

اغينة السادة الكرام هى أول أغنية من الالبوم الجديد و سعيد جدا بردود الافعال السادة الكرام من ألحانى و من كلمات سامح الكومى و توزيع محمد جابر .

عارفين إنك مخلص الالبوم الجديد من فترة عاوزين نعرف تفاصيل الالبوم وليه لحد دلوقتى منزلش؟ 

أنا مخلص الالبوم من سنة و سبب التاخير فى طرحه هو فيرس كورونا اللعين ,الالبوم بيه أغانى متنوعة تم تصوير أغنية من فترة تحمل اسم ” وردة البيت ” من كلمات و ألحان عزيز الشافعى فى أول تعاون بينا وتوزيع كريم عبد الوهاب ومن إخراج محمد القاضى ،وهناك عدد كبير من أغانى الالبوم تم تصويرها أيضا بطريقة مختلفة وجديدة عليا .

الالبوم يضم 8 أغانى ويضم عدد كبيرا من الشعراء و الموزعين و الملحنين ، من ضمنهم أشرف البرنس ، طه الحكيم ، تامر حجاج ، عزيز الشافعى عصام حجاج ، كريم عبد الوهاب ،سيد شعبان عبد الرحيم ،احمد امين ،سامج الكومى،محمد مختار ، اسلام شيبسى ، فضل الراوى ،صلاح مندى 

ليه طارق الشيخ مختفى عن الاعلام ؟

مش مختفى متواجد ولكن لم احب الظهور المستمر فى الاعلام أنا بظهر بس لما بكون عامل حاجه جديدة للجمهور

مشوار طارق الشيخ كان مليان مشقة و تعب .. كنت بتفكر ازاى فى الوقت ده و هل توقعت توصل لقلوب الجمهور بالسرعة دى  ؟

كنت سيبها على ربنا ودايما اى حد بيتعب فى شغله ربنا بيكرمه

أغانى طارق الشيخ بيسمعها تقريبا كل الاعمار السنية و كل الفئات ..بتخار الاغانى ازاى ؟

أهم حاجه فى اختيارى للاغانى هى الكلمات الكلمة اللى هوصلها للناس ميكنش فيها اى إسفاف أو اى معنى خارج ويكون ليها معنى و رسالة توصل لقلوب الناس

ايه رأيك فى فكرة التريند ..كل واحد بيبقى عاوز يعمل حاجة حتى لو غريبة على مجتمنا المهم يركب التريند ؟

فكرة التريند دى كلها قصص واهميه التريند الحقيقى هو الجمهور إللى شايلك أغانى حلوة وحافظ أغانيك وهو اللى عارفك كويس ،وانا لم احب فكرة التريند واى حد بيفكرإنه يعمل اى حاجه غريبة وخلاص عشان يركب التريند بقوله ده بينقصك مش بيزيدك عند الجمهور

انت شايف ازاى الغناء الشعبى دلوقتى ؟

الغناء الشعبى زى ماهو فى مكانه الغناء الشعبى به عمالقة كبيرة منهم الاستاذ احمد عدوية و الاستاذ عبد الباسط حمودة فيه كمان شيبه ، الليثى رضا البحراوى و فى اسماء كتيرة جدا و لايوجد وجه مقارنة بين الغناء الشعبى و المهرجانات

مين اللى بيسلطن طارق الشيخ ؟

النجم حسن الاسمر ده مدرسة لوحده

لو طلبنا منك توصف كل شخص بكلمة تقولهم ايه : احمد عدوية ، حسن الاسمر ، شيبة ، محمود الليثى ، رضا البحراوى ، سعد الصغير ، عبد الباسط حمودة ؟

 الفنان الجميل احمد عدوية ده اسمه الباقة الجميلة لو فضلت تدور على اعماله هتلاقى كل حاجه عملها حلوة ، الفنان حسن الاسمر ده الورث ورثت حاجه تتباها بيها تراث الغناء الشعبى ، شيبة زى الكابتن احمد شوبير فى الكورة ايوب الكورة المصرية و شيبة ايوب الغناء الشعبى صبروربنا اكرمه فى الاخر ، محمود الليثى الجرىء لو اى فكرة عجبته على بال ما انت تفكر فيها يكون عملها و نفذها وطلعها للنور ، رضا البحراوى مشروع نجم واعد و هيكون ليه مكانة كبيرة فى الغناء الشعبى ، سعد الصغير هو اول واحد ينشىء حالة جديدة فى الافراح و الحفلات و بقى عندنا 50 سعد الصغير بس سعد الصغير هيفضل هو سعد الصغير ،عبد الباسط حمودة ده حكمدار الاغنية الشعبية

مين بينافس طارق الشيخ فى الغناء الشعبى ؟

مش منافسه هى بتتحسب رصيدك ايه عند الجمهور

مين رقم واحد فى الغناء الشعبى ؟

مسالة الارقام دى ليها مقياس تانى خالص اول حاجة بحب الجمهور ليك و رصيدك ايه عن الجمهور لكن لو هتحسبها بالتريند يبقى انت كدة ظلمت ناس كتير لاننا كلنا عارفين طريقة التريند وراى اللى عمرى ما هغيره رقم واحد هو سابقة الاعمال لكل نجم

صرحت قبل كدة ان الحاجة الوحيدة اللى مش بتحبها الراقصات فى الافراح مع إن الرقصات دائما بيرقصوا على الغناء الشعبى ؟

معنديش اى مشكلة انهم يرقصوا بس فى فرق بين فنانة استعراضية جاى ترقص باللبس المحترم واحدة تانية جاية ترقص شبه عريانة عمر الرقص الشرقى ماكان بالعري  

هل ممكن تقدم اغانى مهرجانات ؟

صعب جدا انا مطرب بغنى بمزيكا اما ما يسمى بالمهرجانات دول قتلوا المزيكا فى اغانيهم انت بتسمع خبط ورزع بس مفيش مزيكا بتسمعها

عملت قلبان من فترة أثناء ظهورك مع ابلة فاهيتا و انت بتغنى للنادى الاهلى على الرغم من انك زملكاوى صميم عاوزين نعرف كواليس الحلقة ؟

برنامج أبلة فاهيتا برنامج ساخر المشاهد متعود على الضحك و الفكاها أنا غنيت الاغنية على سبيل الهزار لم اقصد نهائى إهانة لاى حد أو سخرية لاى شخص أو كيان،ردود الافعال بعد الحلقة جاءت حاجة تانية خالص لم أكن اتوقعها

 

ايه اكتر تعليق جالك وضايقك من جمهور نادى الزمالك وكام واحد شتمك بصراحة ؟

لأ ده أنا أخدة شتيمة لحد عشرين سنة لقدام ،للاسف الشديد السوشيال ميديا تأثرها السلبى أكتر بكتير من تأثرها الايجابى

تفتكر ان جمهور الزمالك اللى كان بيحبك كدة خسرتة ؟

لأ طبعا مخسرتش جمهور نادى الزمالك الجمهور كان فاكر إنى أنا غنيت الاغنية مقابل فلوس لكن أنا والله ما اخدتش أى فلوس و صرحت قبل كدة فى كذا برنامج اننى لم اتقاضى اى مقابل مادى لغناء القاضية ممكن و عمرى ما هنغنى الاغنية تانى

ممكن تغير ويكون انتمائك للنادى الاهلى ؟

إستحالة أغير إنتمائى أنا زملكاوى و بحب نادى الزمالك ، لكن هشجع طبعا النادى الاهلى فى كاس العالم للاندية لانه بيلعب باسم مصر .

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق