ثقافة وفن

تنمية مهارات الانامل الدقيقة وتآزر العين مع اليد

بقلم أيه محمد الشيخ

تنمية مهارات الانامل الدقيقة وتآزر العين مع اليد 👌🏻
كتير من الامهات جات قالتلى ياميس آية ابنى عارف الارقام والحروف بس مش بيعرف يمسك القلم ومسكته للقلم ضعيفه جدااا ومش عارفه اعمل معاه ايه؟؟؟؟
والله الحل بسيط جدااا ومن ادوات متوفرة فى كل بيت 👌🏻 ازاى ياميس؟
انا هاقولك مجموعه من الأفكار البسيطه جدا اللى تساعدك على تقوية الحركات الدقيقة لطفلك وتساعده على كتابة الحروف والارقام 💕
اول حاجه: هنجيب قطعة صغيره من المشمع وطبقين واحد فى مياه والتانى فاضى وقطعة سفنجه وابدأ ادرب الطفل انه يمسك السفنجه ويغطسها بالطبق اللى فى مياه ويعصرها فى طبق الفاضى 👏🏻.. اول مرة مساعده كليه بعد كده جزئية بعد كده نتلاشى المساعدات تماما فى كل الافكار اللى هاقولهالك تمام كده ياست الكل 👌🏻
طيب ايه تانى ياميس؟؟؟
هنجيب افرخ جرايد قديمه عندنا ونخلى الطفل يقطعها لقطع صغيره بعد كده يكرمشها وياسلام🤗 لو خليناه بعد مايكرمشها يدخلها فى زجاجه قديمه عندنا والله هتدعيلى 👌🏻
هدعيلك بس قوليلى ايه تانى 🙏🏻
هاقولك هنجيب اسليم او معجون طين صلصال ونخلى الطفل يعجنه وبعد كده يعمل بأدواته اشكال او نخبيلو لعب صغيره فيه ونطلب منه يطلعها 💖 او نجيب حصاله لو مش متوفره نجيب كرتونه قديمه صغيره او اى علبه عندنا ونخرمها من فوق ونجيب عملات معدنية مختلفة الاحجام ونخلى الطفل يدخلها داخل الحصالة👌🏻 💕ده هيساعده ياميس آية؟؟
والله هيساعده بس خليكى معايا للأخر ونفذى اللى بقولك عليه!!!
تمـــــــــــــــام👏🏻
بعد كده هنجيب خلة الاسنان ونخلى الطفل يغرسها فى معجون الطين صلصال او يدخل خلة الشيش طاووق داخل زجاجه فارغه وياسلام لو فضناها وخلناه يدخلها فى علبتها هنا مش هيكون تقوية الحركات الدقيقة بس لاااااا ده 💋 تآزر بصرى حركى وانتباه وتركيز وتقوية حركات دقيقه وتنشيط خلايا المخ وكمان تنفيذ اوامر وتزويد الحصيله اللغوية 👏🏻👏🏻
او نجيب القطارة بتاع العين الفارغه ونغسلها كويس ونخلى الطفل يضغط عليهااااا👌🏻 لا ياميس بلاش دى 🙈 تمام ياست الكل هاتى توك صغيرة بتاع بنوتك وضعى واحده فى الصبعين السبابه والابهام وخليه يفتح ايده ويغلقها 3 مرات افقى و3 رأسى اظن دى كده سهله وكمان امنه ولا تزعلى 💕
او ممكن نضع التوكه فى المشبك ونخلى الطفل يفتحه ويغلقه بتساعد ايضا على تقوية الحركات الدقيقة او يضع المشابك على نتيجه قديمة عندنا وياسلام لو المشابك ملونه هنا يتعلم الطفل معانا الالوان وكمان يتعلم التطابق 💝 ازاى ياميس تطابق؟؟؟ هاقولك النتيجه بيكون عليها كتابه او رسومات والرسومات ملونه نخليه عند الكتابه الحمره مشبك احمر وهكذا شغلى دماغك ياست الكل طيب ايه تانى؟
هاقولك نجيب مكرونات مختلفة الاحجام ورباط حذاء قديم نكون غسلينه كويس ونخليه يدخلها فى الرباط ولو لونتيها يبقا كتر الف خيرك 💋👏🏻 او نجيب الخله بتاع الشيش طاووق ونثبتها على معجون طين صلصال وندخل المكرونات فيه 👌🏻
او نجيب برطمنات قديمه عندنا وازايز مياه فارغه ونخليه يركب الغطيان ويفكهااااا 👌🏻👏🏻 سهله دى ياميس 🤗 ماشى ياستى المهم التنفيذ😜 هاتى قطع شليموه وقصيها وخليه يداخلها فى الخله او الرباط 👌🏻 لا مش عندى شليموه خلاص هاتى بلاستر والصقيه على المكتب وخليه يشيله او خلى طفلك يفتح ويغلق مقبض الباب او هاتى تيشرت فى زراير وخليه يفكها ويركبها او اسويتشيرت بسوسته يفتح ويقفل كل ده واكتر من داخل البيت ويساعد طفلك على تقوية الحركات الدقيقه وتنفيذ الاوامر والالوان وتآزر بصرى حركى وانتباه وتركيز وتقليل فرط الحركه وكمان تنشيط خلايا المخ واخر حاجه وابنك هيبنسط بيها بس انت مش هتعمليهاااا 😂 هنجيب بلونات صغيره الحجم وننفخها شويه صغيرين ونضع فيها مياه ونخلى طفلك يضغط عليها لحد ماتفرقع واول ماتفرقع نضحكله ونقولو هيه 🤗💋
ونحضنه ونبوسه طبعا كل ده نعمله عن طريق اللعب وبحب ونضحك ونهزر مع طفلنا عادى والله طلما ابنى هيتقدم امام عينى 💖💋
وبعد مانحس بتقدم والطفل بدأ يتحسن نجيب فول.. فصوليا اى نوع من الحبوب ونخليه ينقل من طبق لأخر وكفايه كده عليكى
والمرة الجاية هاقولك الانشطه اللى هنعملها مع طفلك بمسك القلـم 💖 تحـياااااتــى
كانت معكم: “آية محمد الشيخ ”
اخصـائيـة صعوبات تعـلم وتنمـية مهـارات 💕

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى