رياضه عربية وعالمية

المبدعة “مها دعدور”:الحلم مالوش سن و تحقيقه في أي سن بيكون سهل لوعندك تصميم لتحقيق حلمك.

حوار – آية عفت

 

لقاء مجلة مملكتي مع مجموعة من سيدات الأعمال المتميزين بصناعة الهاند ميد خلال احتفالنا بالعيد الرابع لمجلة مملكتي, ولكن هذه المرة نموذج ناجح جدا لكل سيدة تريد ان تحقق حلمها و لو بعد حين، خلال هذا الحوار ستعرفون قصة نجاح ومشوار الاستاذه مها دعدور، وحوارنا كالاتي:

الجميلة الاستاذة مها دعدور
مين اول شخص دعم حضرتك في تنفيذ فكرة تعليم الهاند ميد ؟
بداية من الطفولة و انا بحب كل أعمال الهاند ميد، و اللي نمت فيا الموهبة دي ، و طبعا في المدرسه كان فيه اهتمام بالاشغال اليدوية.

حضرتك خريجة كلية ايه؟
خريجة كلية تجاره قسم محاسبه.

ليه حضرتك مش دخلتي كلية ليها علاقه بالهاند ميد بما ان مهتمه بيه، وعندك الموهبة؟
كنت اتمنى بس للاسف كان علي ايامي مافيش فى المنصورة فنون جميله ولا تطبيقيه ولا حتى تربيه نوعيه و كان مبدأ الإغتراب للدراسه في محافظه اخري مرفوض في اسرتنا.

ازاي عرفتي مبادرة ” الست المصرية”؟
عرفت بالمبادرة من خلال تواصلي مع فنانة ومصممة جلد طبيعي من الاسكندرية كنت بسألها، ازاي اتعلم المجال ده و مفيش في المنصورة كورسات للفن ده ونصحتني بالمبادرة.

ليه حضرتك خدتي القرار ده انك تتعلمي هاند ميد مع ان في ناس كتيرة بتخاف تحقق حلمها حتى لما تكبر بيقل فرصة تحقيق حلمهم؟
أنا مقتنعة إن الموضوع مش مرتبط بسن و طول ما احنا عايشين بنحلم ولازم نستغل طاقتنا في حاجه بنحبها،
والشئ الثاني ان بعد ما أولادي كبروا أصبح فيه وقت فراغ قررت استغله في حاجه بعشقها و اعمل من خلالها ولو مشروع صغير اكبره فيما بعد.

أقسام الهاند ميد كتيرة حضرتك اختارتي تبدعي في إيه ؟
أنا اي حاجه متعلقه بالهاند ميد باحب اتعلمها، و بالفعل اتعلمت حاجات كتير بس مجال تصميم منتجات الجلد، الطبيعي عجبني جدا لان هو عبارة عن مجموعة من الفنون مع بعض فيه تصميم موديلات و فيه فن الرسم و التلوين و فيه فن النحت و فن الحرق و الدق وممكن يدخل معاه شغل كروشيه و ممكن يدخل معاه التطريز،
يعني من الفنون الشاملة بتطوير و تبدع فيها.

ايه اصعب حاجه وجهتك في تعليمك في فن الجلد الطبيعي ؟
الأدوات المستخدمة والخامات مش موجوده فى المنصورة فاضطر اسافر القاهرة او طنطا للشراء، و احيانا بطلب بعض المحلات تشحن ليا.

تصاميم الجلد الطبيعي وأشكاله، سهل ان حضرتك تلاقي تصاميم تنفيذها ولا بتكون صعبه ؟
طبعا باتفرج على المنتجات في المحلات و علي النت بس في النهايه انا اللي بعمل التصميم و انفذه، بس لازم يكون في الذاكرة حصيلة محترمه من الأعمال علشان تدمجي بعض التصميمات أو تطوري تصميم معين و في النهاية بعمل التصميم اللي فيه بصمتي الخاصة.

اول تصميم حضرتك نفذتيه كان ايه، و انطباع الناس كان ايه ؟
اول تصميم كان لشنطه كلاسيكيه لونها زيتي و طبعا كانت اول حاجه اعملها و كل اللي اعرفهم شجعوني و قالولي استمري بس كان فيه بعض الملاحظات عملت بها و عدلتها و كانت النتيجه في النهايه مرضية.

-هل بتلاقي سهولة في بيع المنتجات وتوصيلها للناس ولا لا،
ايه اول حاجه حضرتك بعتيها من تصاميمك ؟
التسويق في البداية كان صعب شويه بس وسائل التواصل الاجتماعي لها دور معقول في أن شغلنا يتم عرضه علي ناس كتير، و من خلاله بيحصل التفاعل.

طريقة التواصل مع حضرتك بتكون ازاي ؟
http://m.me/2107752062568299

-لو حد حابب يتعلم الهاند ميد وخصوصا تصاميم الجلد الطبيعي ، ايه معايير التي تتوافر فيه علشان يكون مصمم ناجح ؟
اللي عاوز يتعلم لازم يكون بيحب شغل الهاند ميد و لازم يكون عنده بال طويل و طاقة عالية، لان علشان تطلعي منتج بياخد وقت و مجهود كبير و يكون فيه حس فني كمان لان التصميم مرتبط بالذوق.

-الفيديوهات الى على النت ممكن حد يكتفي بها فقط انه يتعلم في مجال الهاند ميد ؟
الفيديوهات بتطور شغلك مش بتعلمك يعني لازم تتعلمي ألاساس الاول و بعدين تبني عليه، فالأساس هو الكورس مع المبادرة و بعد كده البناء وهو التعليم من الفيديوهات و الناس المتخصصة في المجال على الانترنت.

-كلمة من حضرتك للي حابب يحقق حلمه ويبدع فيه او في اي مجال اخر مش شرط الهاند ميد ؟
الحلم مالوش سن و تحقيقه في أي سن بيكون سهل لو عندك تصميم لتحقيق حلمك، اهم شئ حدد هدفك و اشتغل عليه و أكيد على قد مجهودك و اخلإصك هتحصد في النهاية،
ممكن تحقيق الحلم يواجه صعوبة في الاول لما احدد هدفي، ازاي ابدا كانت دي مشكلتي لاني سالت كتير ازاي اتعلم للاسف المجال مش موجود في المنصورة، صممت اني لازم احقق الهدف، فضلت اسال ناس كتير جدا من خلال الفيس بوك اللي بيعملوا في نفس المجال، انا من المنصوره يا جماعه و عاوزة اتعلم و مافيش حد يعلمني طيب ممكن اسافر ليكم، و في النهايه كانت النصيحة بالمبادرة اللي فعلا فضلت منتظراها شهور على ما وصلت لنا المنصوره، بس في خلال الفترة دي كنت بدخل اتفرج علي فيديوهات اجنبيه وبتابع
واخدت كورس مبادئ تعليم التقنيات على الجلد، بس كله ده ما جابش نتيجه الا بعد المبادرة، و طبعا كان الكورس مكثف، ودنيا نظمي المدربة بتخرج منا طاقة كبيرة جدا و مش عاوزه اقولك في خلال ال١٠ ايام الكورس كنت عامله ٣ شنط و محافظ و بورتفيه، فطبعا من خلال مجلة مملكتي باشكر المبادرة.

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق