ثقافة وفن

القادرة تكسب “٢”

كتبت رحاب يسري

 

و رجعلتلكم مرة تانية بكلام عن كتاب why men love bitches

وزى ما قلت ان الكتاب بيتلخص فى ان الراجل بيحب الست القادرة المستقلة اللى مش عبء عليه واللى تحسسه انه اضافة مش اساس
وزى ما قلت برضه من وجهة نظرى ان الكتاب بيتكلم عن المجتمع فى العصر الحالى ولا استثنى احد (حتى لو الرجالة انكروا الكلام ده لكن صدقونى بينفذوه حرفيا مهما كان مستواه التعليمى او الاجتماعى او العمرى للأسف ) ولكن ده منافى من رؤيتى لفطرة ربنا اللى خلق عليها الراجل والست .. الكتاب ده معناه ان الرجال مابقوش رجال ولكنهم مجرد ذكور .. والرجل السوى اهميته بتكون بحجم مسؤلياته والتزامه بأدائها وتقديره للمرأة وعطائها مهما كانت مبذرة وسخية فيه وعلى العكس من وجهة نظرى ان الراجل السوى يستمتع بالمسؤلية طالما يرى ثمارها فى رضا وشغف وعطاء المرأة فى حياته ولكن الواقع اثبت غير ذلك .. ففى مجتمع الذكور .. القادرة تكسب .. واللطيفة تقعد فى بيتها تقرا كتاب وتتشحتف على فيلم

وبالتالى نرجع للكتاب عشان المجتمع يستفيد والذكور تهيص ولا عزاء للرجال والنساء الانقياء بفطرة ربهم ولا يبالون بمتغيرات العصر

الست الواقعية المعاصرة مؤلفة الكتاب بتقول
If you let him know from day one that you are willing to bend over backward, he’d want to see just how far you’d be willing to bend! It is human nature!”
(لو الشخص اللي بتعامله عرف إنك هتتشقلب عشان ترضيه، أول تصرف منه هو إنه يشوف أخرك أيه، هي دي الطبيعة البشرية).

بالتالى كانت نصيحتها ان الست لازم تكون شحيحة العطاء .. واحدة واحدة يا سعاد .. ماتعمليش المستحيل لأن المستحيل عمره ماحيكون كفاية لشخص اتعود انك تبذلى اقصى ماعندك لارضاءه .. لأنه حيفضل معاكى لحد ماتخلصى شقلبظات وتبقى منهكة ومنتهكة لأنه شحيح ويقف فى مكانه متفرج .. مستمتع ومستلذ بأكروباتك الحلزونية .. وكل ما تتعبى حيكربجك بكرباج الخصام او الهجر او الخناق او التهديد بالانفصال عشان ترجعى تتشقلبى تانى

فالكاتبة هنا بتقولك انتى اللى لازم تبقى متفرجة وشحيحة العطاء وتنتظرى شهبندر التجار او الفارس الهومام وهو بيحاول يستميلك ويرضيكى

وبكدة احنا بقينا فى السيرك وبنلعب قرود وتعالب ولابوءات وذئاب وكلاب وفئران كما يليق بهذا العصر للأسف

كتاب صادق فى تحليله والكاتبة اختارت نماذج فى بيوتنا جميعا وجاوبت بمنتهى العقلانية والشفافية على سؤال كتير مننا بنسأله .. هى الست دى عملت ايه او ليه حظى كدة بالرغم من انى بعمل كل حاجة صح ؟
انتظرونى فى مقطع واقعى تانى وتحليلى الشخصى

 

 

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق