ثقافة وفن

اكتشاف رأس توت عنخ آمون

كتبت :فاطمة القصاص

علي سن “قلم رصاص” !! هل يعقل هذا نعم إنه عمل فني منحوت بي أنامل الفنان” إبراهيم بلال” ٢٨ سنة ليسانس حقوق، أول ماقابلناه كان لازم نساله أنت ازاي اكتشفت الموهبة دي عندك ؟

أنا برسم من زمان جدا من وأنا فى المرحلة الإبتدائية ، في البداية كان الرسم بالنسبالي مجرد تفريغ طاقة لحد مادخلت المرحلة الثانوية، بدأت أحس أن الرسم بالنسبالي أكبر من كونه تفريغ طاقة ومع الوقت بدأت مهارتي تتطور فيه كل ما الوقت يعدي ، دخلت الجامعة وكنت ساعتها بدأت أحس أن توجهي بقي فني بحت، وأن الدراسة مش لايقة عليا خالص ، وصلت لتانية جامعة وكان الرسم أستحوذ علي كل حاجة تقريبا ، بدأت أتعمق فيه وأدرسه أكتر من الأول لحد ما دخلت في الموضوع وبقي يستحيل أعرف أخرج منه ، أنا في أي مجال بكون فيه مبعرفش أكون حد عادي ، دايما أي سكة بدخلها بعمل كل اللي عليا واكتر علشان أكون فيها رقم 1 لو مكنتش الوحيد ، الموضوع مرهق جدا ومتعب في ظل الوقت اللي الفن فيه مش شيء مهم ومطلوب.

متى اتخذت القرار أنك ترجع تاني لحلمك وهوايتك ؟

من ٣ سنين شوفت صورة منحوتة لفنان روسي اسمه salvat Fidai ساعتها الموضوع لفت انتباهي بشكل كبير جدا وقولت لازم أجربه ، بدأت فعلا في نحت أول تجربة وكانت فاشلة ، التانية برضو فاشلة لحد ما وصلت ل 10 مرات فشل ، بعدها بدأ الموضوع يظبط الي حد ما ،

حاسس أنك نجحت عشان كنت مؤمن بنفسك ولا كان مجرد حظ ؟؟ انا مش من الناس اللي بتشوف أي شيء مستحيل ، حرفيا معرفش يعني ايه مستحيل ، وطالما واحد زي ده قدر ينفذ يبقي أنا كمان أقدر أنفذ ، ده الشيء اللي إداني طاقة أحاول مرة وآتنين وعشرة ، لحد مانفذت أول منحوتة ودي اللي أدتني الثقة نزلتها علي انستجرام شافها بالصدفة فنان تايواني اسمه “chen chu lee” وعمل لى كومنت معناه كمل هيجي منك ، أخدت الجملة دي قاعدة ومحفز أنى أكمل أكتر ف الموضوع، مع المحاولات الكتير والمستمرة بدأت النتائج تبقي افضل وكل مرة بتكون افضل من اللي قبلها ، لحد ما وصلت دلوقتي لمستوي كويس الي حد ما رغم اني مش راضي عنه برضو.

ازاي خطر علي بالك تعمل منحوتة أثرية ؟؟

بالنسبة للمنحوتات الأثرية هي فكرة خطرت في بالي كنوع من التوظيف الجيد للفن النادر ده ، كل اللي بينحتوا بينحتوا حاجات متمثلش قيمة كبيرة ، فقلت ليه موظفش ده في هدف قومي وهو الترويج للاثار المصرية ،

ايه الأعمال الأثرية اللى قمت بنحتها علي “سن القلم ” ؟ عملت منحوتة توت عنخ آمون وقبلها عملت حجر رشيد وقدمته في جينيس، علي بك السلانكلي “محافظ رشيد في عهد الاحتلال الإنجليزي” ، وحاليا شغال ف منحوتة لانوبيس وتم قبول الطلب ودلوقتي أنا هدخل علي مرحلة لجنة الخبراء إن شاء الله خلال أسبوعين أو تلاتة.

كيف ستعمل على تسويق أعمالك الفترة القادمة؟؟

دلوقتي بجهز لمعرض هو الأول من نوعه علي مستوي العالم ، هيتم تنفيذ نسبة كبيرة من المنحوتات الأثرية وعلي أمل يتعرضوا كلهم في معرض خاص، وساعتها هكون أول حد عملها في العالم ، طموحي كبير جدا الحمد لله بس للأسف لا يوجد تفاعل كبير مع الموضوع والدعم بكل أنواعه مش موجود أو قليل مقارنة باللي بحلم أحققه ، بس إن شاء الله مكمل رغم أي شيء والمعرض هو حلمي حاليا.

ربنا يوفقك وانشالله احنا معاك وبندعمك أنت وكل موهوب ونتمني نحن أسره مجله”مملكتي” حضورنا المعرض القادم ويكون داخل المتحف المصري الجديد وعمل التغطية لأنه هيكون عمل مختلف وفريد وتسويق للسياحة في مصر بشكل مختلف.

اظهر المزيد

مجلة مملكتي

مجلتنا هي نقطة شروع جديدة ومميزة لبناء أمرأة واسرة ومجتمع لائق ومتحضر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق